Pagkarga sa karneng lab-as did-an, gawas kon luto na

Dili tugotan ang pagpagawas og lab-as nga karne sa Bohol ingon man ang pagpasulod niini kon wala kini kamatuoran nga gikan kini sa kasaligan ug limpyo nga tinubdan.

Og kabahin sa kasaligan nga tinubdan, kinahanglan nga ang karne nagagikan lamang sa ihawan (abbatoir) nga na-accredit sa Bureau of Animal Industry (BAI) sa Department of Agriculture, matud pa ni Dr. Maria Eleonor Abisado.

Hinuon, kon pugson gyud og karga, kinahanglang lutoon kini aron mamatay ang kagaw nga mahimong maoy makatakod, kon ugaling aduna may sakit, tambag sa beterinaryo.

Kini aron pagpaneguro nga ang karne dili kontaminado nga maka-angin na hinuon sa pagkasakit sa mokaon niini, ug pagpaneguro nga walay sakit ang hayop nga giihaw nga maka-angin na hinuon sa pagkatakud sa mga hayupan.

Kon ang karne pinalit gikan sa usa ka mall nga kansang ihawan rehistrado sa BAI, ipakita lamang ang resibo sa pagpalit, samtang kon buhi nga hayop, kinahanglang kini paga ubanan sa veterinary health certificate, vaccination record ogsa shipping permit gikan sa BAI.

Sa mga karne nga gikan lamang sa mga ihawan nga wala mahisakop sa mga ihawan nga gidumala sa BAI, kinahanglang kining did-an sa pagkarga ug ang kapitan sa barko nga mokarga niini, multahan gayud, sumpay ni Philippine Coast Guard chief and master at arms Elmer Esteves.

Ipabalik sa gigikanan o kon dili na mahimo, ipaagi na lamang sa pagluto aron mamatay ang bisan unsa nga kagaw nga mahimong madala sa karne nga posibleng makatakud sa ubang hayupan, dugang usab ni Dr Abisado, agi og tambag sa mga masayangan og mamugos nga ikatabok ang karne.

Si Dr Abisado ug ang BAI maoy natahasan sa pagpaneguro nga dili hitakdan ang mga hayop sa mga sakit nga makadaut sa lokal nga panghayupan.

Ang tag-iya sa barko ug ang kapitan manubag sa multa ug mga kaso nga atubangon kon hingsakpang nagkarga sa karne o hayupan nga walay dokumento, saysay pa usab sa Philippine Coast Guard.

Gani, batok sa gika-intapan nga bird flu o avian influenza, padayon pa ang pagmonitor sa BAI ug sa mga tinugyanan samtang nia pa sa tumoy nga bahin sa migration sa mga langgam nga migratory.

Kahinumduman nga sa milabay nga tuig, nahalipugwat ang kadaghanan sa industriya sa poultry dihang nataho ang outbreak sa bird flu sa Nueva Ecija ug Pampanga.

Ang sakit nga naka-angin sa mga manok, pato ug gikahadlokan nga motabok ngadto na sa tawo, giingon nga mahimong madala sa mga langgam nga mohup sa mga danawan sa Pampanga sa ilang paghiklin sa bugnaw nga mga nasud nga may snow.

Daghang lugar sa Bohol nga gitumbok nga tugpahanan, pahuwayanan ug hugpanan sa susamang mga langgam nga mahimong maoy maka-ingon nga hingtakdan ang mga lokal nga hayupan. (rahc/PIA-7/Bohol)

Comments

comments

About the Author

boholtribune.com
The Bohol Tribune is the leading newspaper in Bohol, Philippines, circulating in Tagbilaran City and in Bohol's 47 towns. Widely considered as the best newspaper in Bohol, The Bohol Tribune offers the most comprehensive coverage of news and features, presented in a world-class printing quality. For feedback/inquiries: 0920-630-1130 (smart) | 0927-6310-965 (globe) Landline: 038-501-0919 | E-mail: boholtribune@gmail.com

Be the first to comment on "Pagkarga sa karneng lab-as did-an, gawas kon luto na"

Leave a comment

Your email address will not be published.


*