Body cameras sa anti-drug abuse operatives gisang-at na sa CPOC

Giduso na sa City Peace and Order Council (CPOC) ang hangyo sa mga kapolisan sa syudad nga magpapalit og siyam ka mga body cameras alang sa mga operatiba sa City Anti-Drug Abuse.

Ang body cameras gituohan nga dako og ikatabang aron pamatud-an sa kapolisan nga walay trampas ang ilang mga operasyon ug magpamatuod usab nga kon may makita nga pagsukol ang subject, may prueba na.

Kini usab subay sa laraw ni Police superintendent Patricio Degay, hepe sa kapolisan sa Tagbilaran aron ikapakita nga tataw ug walay trampas ang sugdan na usab nga subsob nga operasyon batok sa ilegal nga drugas.

Kahinumduman nga ang mga kapolisan napahimutang sa alanganin tungod sa pasangil nga daghan sa mga anti-drug operations nga ilang gi-apilan ang naglambigit sa gi-ingon nga extra-judicial killings, butang nga hugot nga gihimakak sa mga otoridad sa kapolisan.

Karon samtang gipahimutang na sa City Anti-Drug Abuse Council (CADAC) ang Matrix Intensive Out-Patient (MIOP) rehabilitation programs, daghan ang mga unang nagpakita og pagtahan sa kaugalingon sa kampanya sa drugas ang wala na motuman sa mga kasabutan nga mag-bag-o.

Gani, segun sa datus nga gipakita sa CADAC pinaagi sa action officer niini nga si Alvin Acuzar, daghang kabarangayan sa Tagbilaran kansang mga misurrender sa Oplan Tokhang ang nangahilis na sa Community Based Rehabilitation Program With Out Walls (CBRP-WOW).

Bisan kon may tinud-anay gayud nga nagtamud sa pagtambong sa mga programa sa CADAC, daghan na usab ang nataho nga mibalik sa karaang binuhatang hiwi, segun sa CPOC.

Unan na usab nga gipaundang ni Presidente Rodrigo Duterte ang suporta sa kapolisan sa kampanya sa ilegal nga drugas ug ang Philippine Drug Enforcement Agency and gisangonan, apan wala magdagway’g malampuson.

Karon nga gibalik na sa kapolisan ang pagpanguna sa kampanya, mihangyo gilayon ang kapolisan sa syudad ngadto sa Liga ng Mga Barangay aron katabangan sa pagpalit sa nahisgutang body cameras.

Segun pa sa City (Department) of Interior and Local Government (CILG) pinaagi ni Mardonio Roxas, sanglit walay ikapundo ang Liga ng Mga Barangay, gisang-at na gilayon sa CPOC ang hangyo sa pakitabang ngadto sa kagamhanan sa syudad, pinaagi sa CPOC resolution.

Gikataho ni PSupt Degay nga mokabat sa P6,900 ang matag usa ka body camera, ug kini gitiman-an usab ni Bise Mayor Jose Antonio Veloso, kinsa maoy nagpreside sa tigum didto sa Jsjs Seafoods Village Enero 23.

Kon mapalit na ang siyam ka body cameras nga ita-on sa helmet sa matag sakop sa City Anti-Drug Abuse Operatives, hayan kampanti na ang kapolisan nga mohimo sa mga ronda ug mapamatud-an nga walay binu-ang gayud ang mga operasyon batok sa ilegal nga drugas. (rahc/PIA-7/Bohol)

Comments

comments

About the Author

boholtribune.com
The Bohol Tribune is the leading newspaper in Bohol, Philippines, circulating in Tagbilaran City and in Bohol's 47 towns. Widely considered as the best newspaper in Bohol, The Bohol Tribune offers the most comprehensive coverage of news and features, presented in a world-class printing quality. For feedback/inquiries: 0920-630-1130 (smart) | 0927-6310-965 (globe) Landline: 038-501-0919 | E-mail: boholtribune@gmail.com

Be the first to comment on "Body cameras sa anti-drug abuse operatives gisang-at na sa CPOC"

Leave a comment

Your email address will not be published.


*