Ambisyosong NECEBOLEY Interlink gilaumang matuman sa di madugay

GILAUMAN nga konkretong matuman sa di dugayng umaabot ang usa sa labing ambisyosong infrastructure package sa nasud—ang Visayas NECEBOLEY Interlink.
 
Uban niini nga matukod ang higanteng tulay nga magdugtong sa Bohol ug Sugbo, usa ka proyekto nga diha ra nagsumpay sa dila kay way tarung nga plano ug lonlon lang paukyab imbes gibuhat kaniadto.
 
Ang NECEBOLEY minubo sa Negros Oriental, Cebu, Bohol ug Leyte, ug ang NECEBOLEY Interlink maglambigit sa tulay, highway ug mass transit network nga magsumpay sa upat ka mga islang probinsiya.
 
Usa ka unsolicited proposal ubos sa public-private partnership (PPP) ang giduso ngadto sa mga natungdang lalawigan ug kini gipresentar usab ni on-leave Provincial Administrator Alfonso Damalerio II sa Bohol Provincial Development Council (PDC) ganiha.
 
Ang interlink package adunay unom ka mga component—(a) tulay gikan sa Sibulan, Negros Or. ngadto sa Santander, Cebu (b) south transaxial highway gikan sa Santander ngadto’s Naga, Cebu (c) viaduct ug causeway gikan sa Naga ngadto’s SRP o South Reclamation Project, Cebu (d) aqualink bridge gikan sa Cordova, Cebu ngadto’s Getafe sa Bohol (e) highway gikian sa Getafe ngadto’s Ubay, Bohol (f) ug mga tulay gikan sa Ubay ngadto’s islang lungsod sa Pres. Garcia, Bohol lahus ngadto sa Maasin, Southern Leyte.
 
Lahi nga proyekto, ang Cordova-Cebu Link Expressway (CCLEX) o third Cebu-Mactan bridge tukoron na human i-award ang kontrata niini sa niaging semana. (Makita usab ning maong post ang desinyo sa CCLEX)
 
MAGKONEKTAR SA 12 MILYONES NGA POPULASYON
 
Matud ni Damalerio, ang NECEBOLEY Interlink maglambigit sa 238 kilometros nga iconic, high-standard ug all-weather bridge, highway ug mass transit-ready network nga magkonektar sa 12 milyones nga populasyon sa upat ka mga probinsiya.
 
Ang unsolicited proposal gikan sa gitawag og NECEBOLEY Inc. gipresentar ni Damalerio sa iyang pribadong kapasidad.
 
Haniti na usab siya sa interlink project sukad sa pagkonsepto, pagtuon ug hangtud sa presentastyon niini ngadto sa mga opisyal sa NEDA ug eksperto sa University of the Philippines Advisory Council.
 
Dunganon sa pagtrabaho ang tanang component sa interlink package sa kantidad nga $11.5 bilyones o P580 bilyones sud sa tulo ka tuig.
 
Ubos sa PPP, ang operasyon sa interlink dumalahon sa usa ka dakong consortium sa mga inbestor sud sa 50 ka tuig hangtud nga itugyan ngadto sa kagamhanan.
 
Sud sa maong panahon, ang probinsiya lang daan sa Bohol gibanabanang mokita og P150 bilyones nga bahin gikan sa toll fee sa Cebu-Bohol ug Bohol-Leyte interlink.
 
Apil sa labing intresadong consortium o grupo sa mga inbestor ang usa ka higanteng funding institution sa United Kingdom ug dakong infrastructure developer sa Espanya.
 
Ang agresibong proyekto gituki usab ni Gob. Edgar Chatto uban ang mga project proponent ug opisyal sa Sugbo, Negros ug Cordova human sa tigom sa Regional Development Council sa Sugbo niadtong Biyernes. (Ven rebo Arigo)

Comments

comments

About the Author

boholtribune.com
The Bohol Tribune is the leading newspaper in Bohol, Philippines, circulating in Tagbilaran City and in Bohol's 47 towns. Widely considered as the best newspaper in Bohol, The Bohol Tribune offers the most comprehensive coverage of news and features, presented in a world-class printing quality. For feedback/inquiries: 0920-630-1130 (smart) | 0927-6310-965 (globe) Landline: 038-501-0919 | E-mail: boholtribune@gmail.com

Be the first to comment on "Ambisyosong NECEBOLEY Interlink gilaumang matuman sa di madugay"

Leave a comment

Your email address will not be published.


*